Patay ang isa ka mangunguma matapos ginlabo sang makapila ka beses sang duha ka wala makilal-an nga persona sa banwa sang Isabela, Negros Occidental sang Domingo.
Ang biktima ang ginkilala kay Rodolfo Antiquera, 79 anyos residente sa Sitio Esquala, Barangay San Agustin, Isabela, Negros Occidental.
Suno kay P/Maj. Joseph Partidas, hepe sang Isabela Municipal Police Station, may nagpahibalo sa ila nga may nagluntad nga insidente nga pagpanglabo sa nasambitan nga lugar kag sa pagpadulong diri, nasapwan nalang nila nga nagahamyangon ang bangkay sang biktima sa iya mismo puluy-an nga madamo sang pilas tuga sang pagpanglabo.
Santo sa imbestigasyon, natukiban nga may duha ka wala makilal-an nga persona nga nakasakay sa motorsiklo ang nagdulog sa balay samtang may bitbit nga mga espading, kag gilayon nga ginsulod ang balay kag ginlabo-labo ang biktima.
Ang biktima ang naga-isahanon lang sa iya nga balay.
Matapos sang insidente, gilayon naman nga nagsakay sa motorsiklo ang mga suspetsado kag nagpalagyo.
Suno kay Partidas, may ara na sila sang lead natuhoy sa krimen kag ginalantaw nga dumot ang gintunaan sang pagpamatay.
