Patay ang isa ka mangunguma sa Purok Paglaum, Barangay Kumaliskis, Salvador Benedicto, Negros Occidental matapos nga gintiro kag gingulgulan kagab-i.
Ginkilala ang biktima kay Jolito Larigo, 54 anyos, bulag sa asawa, may walo ka mga kabataan kag residente sang amo nga lugar.
Sa interview sang Bombo Radyo Bacolod kay Tarsila Lina, utod sang biktima, wala gid ini sang ideya kun ngaa ginpatay ang ila utod nga person with disability bangud wala man ini sang kaaway.
Suno kay Lina, ginpahibalo lang sila nga ang ila utod ang ginpatay kagab-i gani ginpadulungan niya ini kag nakita nga may igo sang bala sa ulo kag gingulot pa sang kutsilyo ang liog sini.
Suno diri, pagpanguma ang ginakuhaan sang biktima sang pang-adlaw-adlaw nga kinahanglanon kun sa diin nagatanom ini sang saging kag mais.
Ginpahayag man ni Lina nga ang biktima ang ginapadulungan sang ila nga amay sa tion nga magsirom na agud nga updan magtulog.
Ang balay sang biktima ang may yara sang duha ka kwarto kun sa diin ang isa ang iya ginatulugan samtang ang isa ang ginatulugan naman sang amay sini.
Suno diri, nakibot man sila nga ginpatay ang ila nga utod nga wala man ini sang kontra kag sa pihak sang sitwasyon sini nagatrabaho ini sa ila nga uma.
Samtang suno naman sa bata sang biktima nga si Rejoy Larigo, wala man ini nakahibalo sa natabo sa ila amay bangud aga pa ini nagpaligo agud nga mag-ubra sa kampo.
Nakahibalo lamang ini sang ginkuha niya ang iya nga cellphone sa kamalig agud kuntani magchat.
Nagtawag man ini sa ila himata agud nga makumpirmar kun matuod ang natabo antes ginpadulungan ang balay sang biktima.
Suno kay Larigo, ginapanumdom sini kun sin-o ang may kahimuan sa pagpatay sa ila amay bangud wala man ini sang kontra sa ila lugar.
Wala man sang kaaway ang biktima bangud sa duta nga ginauma sini kaupod ang iya lolo.
