Naga-alisngaw nga manhole ang ginareklamo sang mga vendors sa Libertad Public Market.
Ang manhole ang ginatabunan man sang metal agud nga indi mahulog ang nagabakal, nagabaligya ukon ang nagapadulong sa nasambit nga merkado.
Sa interview sang Bombo Radyo Bacolod kay Ma Elena Lau, isa ka tindera sa Libertad Public Market, isa ka senior citizen, ginareklamo ang indi maayo nga baho ang mahaklo sini kag ang ginalantaw sini nga ginahalinan sang baho kag ginapahayag nga kun ini ang mabuksan, makita nga madamo na ang basura.
Nagakabala man si Lau nga sa padayon nga ginalabayan sang mga tawo nga may dala nga binanyera nga isda, mahimo ini mawasak kag mabulasot ang mga nagalabay diri.
Ginpahayag man ni Lau nga ginpadulungan na sini ang opisina sang City Engineers Office kag siya ang ginpasalig nga may yara na sang budget para diri kag natalana nga pakadtuan agud nga makay-o apang tubtob sa karun wala sagihapon makay-o.
Suno pa diri, sang tinalikdan nga tuig, may yara sang isa ka senior citizen ang napilasan bangud nga nakasandad sa gintapal nga metal sheet.
Nagapanawagan ini sa ciudad sang Bacolod nga kuntani matalupangdan man ang iya nga ginareklamo kag ini ang makay-o sa gilayon.
