Natalana nga magapatigayon sang nationwide transport strike ang transport group nga MANIBELA kasunod sa liwat nga pagsaka sang presyo sang produktong petrolyo.
Sa interview sang Bombo Radyo kay MANIBELA Chairman Mar Valbuena, ginpahayag sini nga dugang palas-anon na naman sang mga motorista ang liwat nga pagsaka sang presyo sang gatong.
Suno kay Valbuena, sa subong, indi na nila mabatyagan nga may yara pa sang gobyerno.
Ini bangud suno diri, wala sang ginahimo ang gobyerno agud ma-amyendahan ang madugay na nila nga panawagan nga pagkakas sang value added tax (VAT) kag excise tax sa produktong petrolyo.
Ginalantaw man sang Manibela Chairman nga indi ma-amyendahan sang kongreso ang oil deregulation law bangud, politiko man ang tag-iya sang mga gasolinahan ukon ila abyan.
Sa subong, ginpahayag sini nga mabatyagan sang mga pasahero nga madutay na lamang ang nagabiyahe.
Ini bangud suno kay Valbuena, iban sa mga driver ang mas ginpili nalang nga magpuli sa ila probinsya bangud wala na gid sila sang maipuli nga income sa pagbiyahe.
Gani suno diri, nagahinun-anon sila nga mga transport group kun ano ila dapat himuon sa masunod nga mga inadlaw kalakip na ang plano nga pagpatigayon sang transport strike.
