Ginkalipay sang Department of Tourism-Region 6 ang pagkilala sang Guinness World Records sa “Manok ni Cano Gwapo” hotel nga yara sa ciudad sang Talisay bilang “Worlds’ largest building in a shape of chicken”.
Kahapon gin-award ni Jimmylyn Cordero sang DOT-Region 6 ang certificate of accreditation kay former Bacolod City Councilor Ricardo “Cano” Tan, tag-iya sang Campuestohan Highland Resort sa Talisay City.
Suno kay Cordero, ini ang ikaduha nga kahigayunan nga nakatambong ini sa pag-award sang Guinness World Records kag una nga bes amo ang sa probinsya sang Isabela kag sadto naglaum ini nga makabaton man sang amo nga award ang probinsya sang Negros Occidental.
Madumduman nga nagbaton sang award gikan sa Guinness World Records ang Isabela Province bangod 2,495 ka mga performers ang nagsuksok sang scarecrow costumes sa ginpatigayon nga street dance sa Ilagan City, Isabela.
Sa karun dako ang pagpasalamat ni Cordero kay former Councilor “Cano” Tan sa pagdala sang Guinness World Records sa Negros Occidental province.
