Ginahulat nalang sang Manokan Country Vendors ang sabat sang Bacolod City Council sa ginpadala nga compromise letter kahapon.
Nahibaluan nga sang Hulyo 5 na patigayunon ang closure sang mga pwesto sang Bacolod City Legal Office, apang gin-ayo nga mahatagan sang allowance tubtob Hulyo 20 bilang transition sa bag-o nga pwesto.
Sa interview sang Bombo Radyo Bacolod kay Tess Umbao Mondres, tenant kag nagaserbe nga tagpamaba sang mga vendors sa Manokan Country, under negotiation pa ang ila posisyon.
Magluwas sa pag-ayo nga sila ang mahatagan sang extension tubtob sa Hulyo 20 agud mahitso ang tubig kag kuryente sa pagsaylo sa temporary site, nalakip man sa compromise letter ang pila ka mga kondisyones.
Paathag ni Mondres nga ang letter ang pirmado sang 23 ka mga Manokan Country Vendors.
Samtang aga paman nagbantay si Atty Jomax Ortiz, legal counsel sang Manokan Vendors Association kun magapatuman sang closure ang Bacolod City Legal Office.
Aminado si Ortiz nga nabatun na ni Councilor Vladimir Gonzales ang compromise letter sang mga vendors.
Apang sila ang nagahingyo sang memorandum of agreement nga magaseguro ang ila sitwasyon, bangod kun indi mahatagan sila ang mabutang na lamang sa kamot sang Sm Prime Holdings Inc. sa sulod sang 40 ka tuig nga implementasyon sang lease contract.
Dugang pa sang abogado nga natumod nga may kanya kanya nga ordinansa ang Manokan Country, Vendors Plaza kag Bacolod Arts and Youth Sports Center (BAYS Center) nga dapat anay ma-amyendahan antes magpatuman sang rennovation.
Panawagan man sini nga makapatigayon sang dialogo agud makadihon sang win-win solution nga wala sang tuman nga mamiyerdihan.
