Ginpanugyan sang Bacolod City Legal Officer sa mga Manokan Country vendors nga nagapinsar nga ginalapas ang ila kinamatarong sa patigayunon nga closure kag rellocation nga magfile na lamang sang kaso sa korte.
Sa interview sang Bombo Radyo Bacolod kay Atty Romeo Carlos Ting Jr. indi aplikable ang panindugan sang mga vendors nga ‘no court order no demolition’ bangod ini ang para lamang sa pribado nga propedad.
Sa baylo, panindugan sini nga may layi nga sarang mapatigayon ang aktibidad bisan pinaagi lamang sa notice kun ini ang government property.
Suno diri kun nagapanindugan gid ang mga vendors nga ginalapas ang ila kinamatarong sarang sila magfile sang injunction ukon temporary restraining order antes ang Hulyo 5.
Panindugan ni Ting nga sumugod Hulyo 5, dayunon gid nila ang closure apang indi pa magpatigayon sang demolition para sa rennovation sang SM Prime Holdings Inc.
Pahanumdom sang abogado nga apisar cultural heritage ang Manokan Country, wala nagakahulugan nga indi makapatigayon sang rennovation, kag ang mga tenants ang temporaryo lamang nga sayluhon samtang ginakay-o ang pasilidad.
Samtang sila ang may publication man sang public bidding apang wala sang may nagkontra sa bid sang SM Prime Holdings Inc.
Nagapati si Ting nga ginapapati lamang sa wala basihan nga rasun ang mga vendors nga mahimo magastuhan lang sa pagbayad sa abogado.
Panindugan sang City Legal Office nga kun indi husto ang ila tikang dapat madugay na sila nga ginpasakaan sang kaso.
Bangod wala sang nagsignify nga luyag magsaylo sa gintalana nga temporary site, ginalantaw ni Ting nga sa last minute inkaso magbag-o ang pinsar sang mga Manokan vendors, ang pahanugutan na lamang nila amo ang mga nakabayad sang arrears kag may-ara sang business permit.
Sa 24 ka mga vendors, may kapin 10 nga wala sang business permit gikan sa ciudad.
Pahanumdom ni Ting nga kun sundon gid ang ordinansa sang 1983, indi gid dapat makabaligya sa Manokan Country ang mga wala nagabayad sang renta.
