Napasakaan na sang kaso nga murder ang suspetsado sa pagpatay sa 16 anyos nga estudaynte sa Barangay Cabahug syudad sang Cadiz sang Biyernes sang hapon.
Ang suspetsado ang ginkilala nga si Allan Tingo, 49 anyos kag residente sa nasambit nga lugar.
Sa interview sang Bombo Radyo kay Police Lieutenant Gina Fernandez, deputy chief sa Cadiz City Police Station, alas 9:00 kahapon sang kaagahon, Disyembre 13, ginpasakaan sang kaso ang suspetsado sa pag-rape kag pagpatay sa grade 11 student nga si April Bacato.
Samtang, padayon pa ang pagpatigayon sang autopsy sa bangkay sang biktima.
Pahayag ni Fernandez, nga santo sa imbestigasyon sang kapulisan, indi matuod ang ginhambal sang suspetsado nga may kaupod ini sa ginhimo nga krimen, apang sa karun wala pa nahibaluan kun ano ang motibo sang suspetsado sa pagsambit sang mga pangalan.
Sa karun, ginahulat pa ang resulta sang autopsy kag pagalantawon naman kun mahimo nga madagdagan sang dugang nga kaso ang suspetsado.
