Tumalagsahon na lamang ang rice retailer nga nagabutang sang label nga special ukon premium sa ila nga mga baligya.
Ini kasunod sa pahayag sang Department of Agriculture nga plano nila nga paluson na lamang ang nasambitan nga label para sa mga imported nga bugas.
Sa interview sang Bombo Radyo Bacolod kay Beltran Villanueva, rice retailer sa Burgos Public Market, halos sa Manila na lamang ang nagabutang sang amo nga label, nga sa masami ginagamit sang mga vendors agud mapasakaan ang ila nga presyo.
Bangod sila ang wala na sini nagabutang kag nagapamangkot na lamang kalabanan sa mga consumers kun ano ang sahi sang bugas nga ginabaligya, wala man sang epekto sa mga ini hinali ipatuman ang pagdula sang label.
Suno kay Villanueva, maiwat ang baklanay sang bugas sang Disyembre 2024 kag bisan ang pilit sini nga isa lamang ka sako ang wala gid maubos.
Dugang pa sini nga sadto madamo sang nagabakal sang tingob bangod luyag mapuno ang ila nga mga bulugasan, apang sa karun kalabanan sa mga customer ang kinilo-kilo na lamang ang ginabakal.
Nagapati si Villanueva nga ini bangod na sa nagalala nga kapigaduhon.
Subong nga Enero, wala pagid sang may nakabakal sa ila, bisan ang ila nga mga suki.
Ang pinakabarato sini nga bugas ang balor P49 nga local rice, apang may mga special grade rice man ini nga lokal nga medyo mas mataas-taas ang presyo.
Pahayag ni Villanueva nga mas ginarekomendar sini ang local rice bangod ang imported rice ang madasig mapan-os kag indi man manami kalo-kaluhon.
Suno diri, wala sang problema sa supply sang ginakuhaan nila sang bugas kag sa Pebrero, sila ang magapaani naman sang ila talamnan.
Apang suno kay Villanueva may pagsaka nga P50 sa kada sako sang gina-order nila nga bugas, gani sa masunod nga senimana, sila ang mahimo magpasaka man sang piso kada kilo.
