Dakop ang isa ka manugbaligya sang bulak nga nagatanom sang marijuana paagi sa operasyon sang mga otoridad nga ginpatigayon sa Purok Catugasan 1, Brgy. Minoyan, Murcia, Negros Occidental kahapon.
Ang suspek ang ginkilala kay Khieno Rubaton, 34 anyos, kasado, isa ka flower vendor kag residente sang nasambit nga lugar.
Nakuha sa paghinakop sini ang 14 ka puno sang marijuana, kag 125 grams sang dried marijuana nga nagabalor sang P15,000.
Sa interview sang Bombo Radyo Bacolod kay Police Captain Merkelly Laganipa, Assistant Chief sang PDEU-Negros Occidental, indi buybust operation ang natabo kundi tatlo ka bulan na ang nakaligad sang nabaton nila ang impormasyon kag ang target ang may yara sang mga tanum nga marijuana.
Suno diri, ang ila confidential informant ang nangin amigo man sang target kun sa diin siya ang ginsaligan.
Sang nakaligad nga inadlaw, gin-istorya sang mga otoridad ang informant nga magaplastar sila sang ila nga personnel bilang middleman para sa dako nga buyer.
Nagsalig man ang subject person sa informant kun sa diin gindala niya pa ini sa iya plantation.
Matapos ang pila ka adlaw nagpadulong man sa plantation ang operatiba sang PDEU nga nagpakuno-kuno nga middleman.
Kahapon sang aga, nabaton sang mga otoridad ang impormasyon nga ang subject ang yara lamang sa plantation kag nagabunyag sang tanom nga marijuana, gani nagpatigayon na ang mga ini sang operasyon batok sa subject kag naaktuhan gid nga nagapamunyag sang tanum nga marijuana.
Suno kay Laganipa, ang kaso nga pangatubangon ni Rubaton ang mabug-at matapos nga nagcultivate ini sang marijuana.
Suspetsa sang mga otoridad nga front lamang sini ang pagbaligya sang bulak sa pagbaligya sang marijuana.
Nakahunong na ini sa Murcia Municipal Police Station kag magapangatubang sang kaso nga paglapas sa section 15 sang RA 9165 ukon Comprehensive Dangerous Drugs Act of 2002.
Ang operasyon ang ginpangunahan sang Philippine Drug Enforcement Unit (PDEU) sang Negros Occidental Police Provincial Office (NOCPPO) kag gin-updan sang Murcia Municipal Police Station, PIU-NOCPPO, Intelligence, Philippine Drug Enforcement Agency (PDEA) kag ang 1st Negros Occidental Provincial Mobile Force Company.
