Nagpanawagan ang isa ka manugbaligya sang firecrackers kag fireworks sa syudad sang Bacolod sa mga manugbakal nga magbakal sang temprano agud malikawan ang pagginutok kag mapractice ang social distancing.
Sa interview sang Bombo Radyo Bacolod kay Ryan Villaruz sang Bacolod City Pyrotechnics Vendors Association, diutay ang mga tawo nga nagapamakal sa karun sa designated area nga ginabaligyaan sang mga palupok sa syudad kag ini ang ginalakipan sang ila mga suki.
Suno kay Villaruz, sa December 29, 30 kag 31 pa ang peak sang pagbaklanay.
Wala man sang nagbag-o sa presyo sang palupok nga ila ginabaligya.
Suno diri, nakadepende man sa klase sang fireworks ang presyo kag ginagarantiya man nila nga safe ang ila ginabaligya.
Ginpasalamatan nila si Executive Assistant to the Mayor Ernie Pineda; katapo sang Bureau of Fire Protection (BFP) Philippine National Police (PNP); Local Government Unit (LGU); Permits and Licensing Office (PLO) nga nagbulig sa ila agud makatigayon kuha sang special permit agud makabaligya sila sa designated area.
Ginapatuman man nila ang minimum health protocols.
May yara sila sang pagsulundan nga no facemask, no faceshield, no entry.
Nagbutang man sila sang baral para maobserbar ang social distancing samtang may yara man sang handwashing area.
May yara man nga iprovide ang city health office nga thermal scanners.
Ginpahayag man ni Villaruz nga indi makasulod ang menor de edad kag senior citizen.
Sa karun, may yara sang 46 ka stalls sang mga firecrackers/fireworks vendors ang napahamtang sa tupad sang Pope John Paul Tower.
Samtang, ginakasubo man sini ang desisyon ni Presidente Rodrigo Duterte nga itotal ban sa madason nga tuig ang firecrackers bangud madulaan sang pangabuhian ang mga nagahimo kag nagabaligya sini.
