Nagalaom ang manugbaligya sang inasal sa Bacolod City Public Plaza nga magdako dako ang ila income sa highlights sang Masskara Festival 2025.
Sa interview sang Bombo Radyo Bacolod kay Elizabeth, tag-iya sang Kim and Rose Inasal, P25,000 ang renta nila sa Kiosk halin Setyembre 1 tubtob sa 19.
Suno sa iya, maiwat ang bumalakal kag yara lamang sa 10 tubtob 20 ang ila customer kada adlaw kun weekdays.
Samtang nagadamo man kun weekends apang indi gid makalab-ot sa 50.
Dugang pa ni Elizabeth nga madamo sila sang palarehas ang baligya, apang aminado ini nga may iban gid nga nagarisgo sa pagpabarato sang ila mga baligya.
Suno diri, nabawi naman nila ang ginrenta nga P25,000 apang kinahanglan pagid nila nga mabatak ang benta agud may ginansya kag maswelduhan ang masobra 10 sini nga tawo.
Pahayag sini nga may benta man ukon wala, bayaran gid sini ang adlawan nga sweldo sang mga empleyado.
Gani nagalaom ini nga sa highlights sang kapiestahan magadamo pagid ang ila nga customers.
Aminado man si Elizabeth nga haluson wala sila sang customer kun nagaulan bangod ginabaha ang ila area, apang madasig man nga nagasubside.
Pangamuyo na lamang sini nga mangin makanay ang tiyempo tubtob magtakop ang Masskara Festival 2025.
