Ginpasalig sang miyembro sang Bacolod City Fireworks and Firecrackers Vendors Association nga indi maglain ang presyo sang palupok nga ila baligya samtang nagahilapit ang pagsugata sang bag-ong tuig.
Sa interview sang Bombo Radyo kay Ryan Villaruz, sang tinalikdan nga adlaw, masami nga nagalabay sa lugar ang ambulansya apang sumugod subong nga adlaw, magabutang naman sa mga baligyaan sang palupok sang standby nga ambulansya.
Nagtukod naman sang booth nga sarang plastaran sang Police personnel, representative sang bureau of fire kag barangay tanod.
Panugyan naman ni Villarus sa mga bumalakal nga likawan nga magginutok sa lugar.
Nahibaluan nga madamo sang mga nagahulat sang peak season antes magbakal, sa paglaom nga makabarato ukon makapangayo sang paaman.
Apang paathag ni Villarus nga indi magalain ang presyo sang pyrotechnics.
Ginpaathag man sini nga mas maayo kun tempranu pa magbakal bangod sa mga indi malikawan nga hitabo kaangay nalang sang pagsarado nila sang Sabado bangod sa mabaskog nga pag-ulan nga nagtuga sang pagbaha sa lugar.
Dugang pa sini nga indi na hulaton nga magginutok agud malikawan ang problema nga matuga sang COVID-19.
Sa karun, indi pa man mahambal ni Villarus kun mahina ang baligyaanay bangod sadto ginkulbaan naman ang mga ini nga wala sang nagabakal petsa 27 tubtob 29 apang nagadamo naman pagdangat sang 30 tubtob 31.
Apang nagalaom nalang ini nga makabawi subong nga tuig apisar nga may mga limitasyon sa paggehu karun nga may pandemic.
