Ginpasakaan na sang kaso ang manughilot nga nagtiro sa iya man mismo nga bayaw sa banwa sang EB Magalona sang Miyerkules sang hapon.
Madumduman nga patay si Romeo Magallanes matapos gintiro sang manughilot nga si Alejandro Selendron, 63 anyos sa EMI Homes Subdivision, Barangay Tanza, EB Magalona.
Ini bangod natukiban nga P23 mil nalang ang nabilin sa kwarta sang suspetsado nga si Selendron nga P90 mil.
Ginkumprontar naman sini ang live-in partner nga si Angelyn Magallanes, 32 anyos kag diri nakahibalo nahanungod nadula nga kwarta nga nagtuga sa ila paglalisay.
Nagpangakig ang utod sang live-in partner nga si Romeo kag nagkuha sang kutsilyo apang nagkuha man sang 9mm caliber pistol sa kwarto ang suspetsado kag ginpaarakan sang luthang ang mag-utod.
Nagtaliwan si Romeo tuga sang madamo nga igo sang bala kag nangin kritikal naman ang kondisyon ni Angelyn.
Kasubong man nga gindala sa ospital ang kaingod balay nga si Winifredo Diosto nga nasalabat sang bala.
Suno kay P/Capt. Joseth Catonina, hepe sang EB Magalona Municipal Police Station, yara na sa estable nga kondisyon si Angelyn Magallanes kag ginahulat nalang nga mag-ayo ini kag ini mismo ang maga-extract sang affidavit agud magpasaka sang kaso.
Una naman nga ginkuhaan sang affidavit ang iloy sini.
Sa kumpirmasyon ni Catonina, wala sang iban nga background nga kaso sa kapulisan ang suspetsado.
Madamo sang kliyente sa pagpanghilot kag maayo ang pagpangabuhi si Selendron bangod maayo ang batasan sini.
Ginalantaw naman sang hepe nga pagka-impito angot sa nadula nga kwarta gani ini ang nangluthang.
