Ginpatpat sang Secretary General sang Alliance of Concerned Teachers (ACT) Partylist Bacolod – Negros Occidental Chapter ang kinalain sa pagtudlo sang sex education sa Elementary kag High School level.
Sa interview sang Bombo Radyo Bacolod kay Grace Abellar, nga isa man ka Grade 3 teacher, nagapati ini nga dapat isanto sa edad sang kabataan ang paagi sang pagtudlo sang sex education.
Ini kasunod sang kontrobersyal nga issue angot sa ginaduso nga Comprehensive Sexual Education sa idalom sang Senate Bill 1979.
Suno kay Abellar, wala ginatudlo bilang subject ang sex education sa Elementarya sa baylo gina-integrate lamang ang porsyon sini sa mga lectures.
Samtang sa High School may ara naman sang ginatudlo nga Reproductive Health Program.
Nagapati si Abellar nga tuyo sang Comprehensive Sexual Education nga matadlong ang orientation sang mga kabataan sa lamharon nga edad sa husto nga pagtipig sa ila lawas partikular na sa pribado nga bahin sang lawas ukon reproductive organs.
Magluwas diri, mahatagan man sila sang paghangop agud makahibalo kun may maglapaw na sa boundary sa mga tawo sa ila nga palibot.
Pinaagi sini mapanubo ang kaso sang sexual abuse, bangod ang kabataan ang nakahibalo na kun indi na husto ang ginahimo sa ila.
Bangod ang mga ginikanan ang indi gid makaseguro sa aktibidad sang ila kabataan sa paggwa sa balay, sila nga mga manunudlo ang kaupod nga nagapahangop sa mga ini.
Panindugan ni Abellar nga sila ang wala naga-encourage para sa mga High School students nga mag-enggage sa sexual activities.
Apang hinali nga ini ang ila himuon, ginapahanumdom sang eskwelahan ang paggamit sang contraceptives kaangay sang condom agud malikawan ang teenage pregnancy.
Kabahin naman diri ang pagtudlo samh sexual orientation ang masturbation, apang ini ang sa mga edad na kun sa diin nagabatyag na sang sexual drive.
Paathag sini nga kun wala sang Comprehensive Sexual Education, wala sang giya sa mga kabataan ilabi na karun nga mahapos na lamang ma-access ang pornography paagi sa cellphone.
