Patay ang 40 anyos nga manunudlo nga naga-angkas sa motorsiklo matapos maaksidente sa Downhill Curve, Secondary National Highway Brgy Dolis, Calatrava, Negros Occidental, sang Miyerkules sang aga.
Sa interview sang Bombo Radyo kay Police Capt Jesus Alba, deputy chief of police sang Calatrava Municipal Police Station, ang biktima ang ginkilala nga si Jennifer Leduna, 40 anyos, manunudlo sa Dolis Elementary School, naga-angkas sa iya live-in partner nga si Noel Borromeo, 46 anyos, samtang nagabyahe padulong sa buluthuan.
Suno kay Alba, wala nakontrolar ni Borromeo ang motorsiklo kag nagtabok sa pihak nga lane kun sa diin nabungguan sini ang isa ka motorsiklo nga nakapark kag nadalahig pa ang 15 anyos nga bata nga lalaki nga nagatindog malapit sa nakapark nga motor.
Bangod sa impact nagtabog si Leduna kag nabunggo ang iya ulo sa semento kag nag-agom ini sang severe head injury nga gintunaan sang iya kamatayon.
Pilason naman si Borromeo kag ang 15 anyos nga lalaki.
Nahibaluan naman nga wala sang suksok nga helmet ang duha.
Suno kay Alba, indi man madasig ang pagpadalagan ni Borromeo sang motor apang wala lang sini makontrolar bangod madugay na ini nga nagtrabaho sa Saudi kag karun lamang liwat nga nagdrive sang motorsiklo.
