Wala na sang kabuhi sang masapwan ang isa ka manunudlo sa sulod sang iya balay sa Barangay Tamao, Tanjay, Negros Oriental, sang Pebrero 9, kapin alas-2:00 sang hapon.
Sa interview sang Bombo Radyo kay Police Executive Master Sergeant Charliven Gantalao, Deputy Chief of Police sang Tanjay Municipal Police Station, ang biktima ang ginkilala nga si Raynaizan Fausto, 43-anyos, kag isa ka manunudlo.
Suno diri, nakita pa sang kaingod balay sang biktima nga buhi si Fausto sang Pebrero 8 sang gab-i apang ini ang nasapwan na lamang nga nagahapaon sa salog nga wala na sang kabuhi sa sulod sang iya kwarto.
Indi naman makit-an ang cellphone, jewelry, kag iban pa nga gamit sang biktima, apang wala man sang may makita nga pilas sa lawas ni Fausto magluwas sa mga lagob sa nagkalain-lain nga bahin sang iya lawas.
Pahayag ni Gantalao, sa nakuha nila nga impormasyon, masami nagadala sang abyan si Fausto sa iya balay para mag-inom inom.
Si Fausto ang miyembro sang lesbian, gay, bisexual, transgender, queer, questioning, intersex, asexual (LGBTQIA).
