Nakahunong na sa Silay City Police Station ang isa ka manunudlo sa syudad sang Silay matapos nga ginserbehan sang warrant of arrest kasunod nga ginreklamo matapos ginpakahuy-an ang isa ka estudyante sang tinalikdan nga tuig.
Ginkilala ang manunudlo nga ginserbehan sang warrant of arrest kay Maria Lourdes Panes kag manunudlo sa Silay South Elementary School.
Madumduman nga si Panes ang ginreklamo sang isa ka iloy matapos nga ginpakahuy-an kag ginsakit sini ang isa ka estudyante.
Sa interview sang Bombo Radyo Bacolod kay Police Lt. Col. Mark Anthony Darroca, ginpadulungan sang katapo sang Silay City Police Station ang manunudlo sa balay sini kag ginserbehan sang warrant of arrest sa kaso nga paglapas sa RA7610 “Special Protection of Children Against Abuse, Exploitation and Discrimination Act.” kag matawhay man nga nag-upod sa mga kapulisan.
Suno kay Darroca nakahunong na ini sa Silay City Police Station kag nagaproseso ini sang iya nga piyansa nga P80,000.00 para sa temporaryo nga kahilwayan.
Suno diri, kinahanglan nga mapiyansahan sini ang iya kaugalingon agud nga indi man ini pag-iAWOL sa iya trabaho apang ang pamunuan lamang sang Department of Education ang makasabat kun ano ang matabo sa suspek matapos ang ginpasaka nga kaso.
Ginkalipay naman ini sang iloy sang gin-abusuhan nga bata bangud sa amat-amat nakuha na nila ang hustisya.
Sa interview sang Bombo Radyo Bacolod kay Catherine Soriba, nagapasalamat ini nga sa amat-amat, nakuha na nila ang hustisya sa natabo sa ila nga bata kag nagapasalamat man ini sa tanan nga mga tawo nga humalin sang natabo sa ila bata, nagsuporta sa ila tubtob subong.
Suno kay Soriba, nasubuan man siya bangud isa man ka iloy si Panes apang kinahanglan nila ini himuon bangud kinahanglan man makuha sang bata ang nagakaigo nga hustisya kag mangin serbe man ini sa iban nga manunudlo.
Desidido man ang bana ni Soriba nga magtambong sa mga hearings kag padayunon ang kaso bangud ang bata nila mismo ang nagapahayag nga luyag nga mapriso ang manunudlo kag wala man naluoy sa manunudlo bangud wala man ini nagkaluoy diri sang siya ang gin-abusuhan.
