Ginalantaw sang Bacolod City Administrator nga isa ka solusyon agud nga maplastar ang mga balaligyaan ukon trade fair sa Rizal St, nga sakop sang Barangay 12, Bacolod City.
Suno kay Bacolod City Administrator Atty. Mark Steven Mayo, may yara gid man sang gin-aprubahan ang Sangguniang Panlungsod nga resolution angot sa pagpahanugot sa pagbutang sang balaligyaan sa Rizal St, nga sakop sang Barangay 12.
Ang resolution gin-aprubahan sang Marso 18 para makatipon sang pondo ang barangay agud gamiton sa ila nga fiesta sa Hunyo 24, 2026.
Suno kay Mayo, mahimo sa gihapon nga madayon ang trade fair paagi sa pagproseso sang Barangay sang partial road closure sa Rizal Street sa Sangguniang Panlungsod agud nga ma-legalize ang pagsira sang bahin sang nasambit nga dalan para sa trade fair.
Nahibaluan nga sang Huwebes, nagsabtanay si Bacolod Traffic and Transport Management Department Head Atty Reuben Sabig kag Punong Barangay JR Alcantara sang ginpabaklas ni Sabig ang mga balaligyaan.
Nagapanindugan si Alcantara nga may yara sila sang permit para sa trade fair apang panindugan naman ni Sabig nga indi pwede matukuran sang balaligyaan ang kilid sang dalan.
Nahibaluan nga pila na ka tuig nagarequest ang barangay nga magtukod sang trade fair para may yara sila sang pondo sa ila nga fiesta.
Ang permit ang gin-aprubahan sang Sangguniang Panlungsod para makaplastar sila sang ila baligya humalin Abril 15 tubtob Hunyo 30 basta yara lamang sa sidewalk.
