BACOLOD CITY — 300, 000 pesos nga balor sang suspected shabu ang narekober sang kapulisan sa isa ka Maranao kag kaupod sini nga runner sang iligal nga druga sa buybust operation nga ginpatigayon sa La Herencia Subdivision, Barangay Mandalagan, Bacolod City, Biyernes sang gab-i.
Arestado sa operasyon nga ginpatigayon sang City Drug Enforcement Unit sanday Elias Cabugatan, 36-anyos sang Purok Fatima, Barangay 31; kag Edwin Vivero sang Barangay Estefania.
Nakuha sa possession sang mga ini ang apat ka dako nga sachet kag tatlo ka elongated sachet sang suspected shabu, isa ka libo ka pesos nga buybust money kag dos mil pesos nga ginapatihan income sa pagbaligya sang druga.
Suno kay Police Inspector Adrian James Albaytar, team leader sang CDEU, high value target si Cabugatan bangud provincewide ang operasyon sini.
Anom ka bulan ang surveillance sang mga pulis antes natigayon ang operasyon.
Sakay sa isa ka SUV ang mga arestado sang sila ang nagpakigkita sa mga operatiba agud ibaligya ang iligal nga druga.
Sa interview sang Bombo Radyo, tuman ang paghilibion ni Cabugatan apang wala ini nagbuya sang anuman nga pahayag kun sa diin niya ginakuha ang shabu.
