(Update) BACOLOD CITY — Nagdesisyon ang kapitan sang Ocean Jet 7 nga ipa-drydock nalang ang barko agud nga ini ang makaayo matapos nag-malfunction ang throttle kag nakabunggo sa docking area sang BREDCO Port kagab-i.
Suno kay Engr. Jose Ramilo Sumague, senior maritime authority development officer sang Maritime Industry Authority Bacolod, pagadal-on ang barko sa drydock area sa Cebu.
Apang antes ini makalayag padulong sa Cebu, kinahanglan pa sang special permit to navigate.
Bangud yara sa Cebu ang home port sang Ocean Jet suno kay Sumague, didto na sila nag-apply sang permit sa MARINA Region 7.
Nahibaluan nga basta makasugata sang aksidente ang isa ka barko, ginasuspende ang Certificate to Navigate sini agud masiguro nga indi na makabyahe.
Sa karon, ginahulat sang MARINA Region 7 suno kay Sumague ang marine protest nga igasumiter sang kapitan sang barko kun sa diin nakasaysay ang bilog nga natabo.
Sa karon, isa nalang ang barko sang Ocean Jet nga nagabyahe Bacolod-Iloilo vice versa kag apat nalang ang trips.
Ini na ang ikaduha ka beses nga nadulaan sang kontrol sa throttle ang Ocean Jet 7.
Ang una nga aksidente ang nagluntad sang Setyembre tuig 2017.
