May-ara sang oplan ang Maritime Industry Authority (MARINA) agud nga maseguro ang kahilwayan sang mga byahero sa kadagatan subong nga paskwa kag bag-ong tuig.
Sa interview sang Bombo Radyo Bacolod kay Atty. Nicole Marie Amuan, legal officer sa MARINA, sila ang magahamtang sang mga personnel sa mga sea ports agud magtsekyar sang mga sakayan kag mga pasahero.
Suno diri, seguruhon nila nga may-ara sang nagakaigo nga mga permits ang mga magalayag nga barko kasubong man ang passenger capacity sini agud malikawan ang overlaoding.
Panugyan man sang MARINA nga tsekyaron na gid ang mga sakayan antes maglayag agud malikawan ang insidente sa tunga sang lawod.
Madumduman nga sang damlag lamang duha ka mga sea vessels ang nagub-an sang makina sa tunga sang lawod, gani indi luyag sang MARINA nga masulit ang mga hitabo ilabi na nga ginapaabot na ang influx sang mga pasahero subong nga paskwa kag bag-ong tuig.
Bangod sa mataas nga demand sa transportasyon, ginapahanugutan man sang MARINA nga makapatigayon sang extra trip ang mga fast craft kag cargo vessels, apang ini ang mahimo lamang sang mga may kumpleto nga permits.
