May hambalanon sa English nga “Age is just a number” buot silingon ang edad ang indi talaksan kun may luyag man kita nga lab-uton, kaangay lamang nga makagraduate sa kurso nga atun naluyagan.
Kaangay lamang sang aktres nga si Marjorie Barreto nga natuman na sini ang madugay nga handum nga makatapos sa kolehiyo sa edad nga 51 anyos.
Ginpakigbahin sang aktres sa social media ang journey sini sa iya pagbalik sa pagtuon sa pihak nga isa ini ka iloy, public servant kag negosyante.
Suno kay Marjorie dako ang kalipay sini kag ginakabig niya nga pinakamanami nga hitabo sa iya graduation ang pag-upod sang iya mga kabataan.
Ginpasalamatan man ni Marjorie ang Philippine Women’s University (PWU) kag ang iya abyan nga si Ruffa Gutierrez sa pagduso sa iya nga magbalik sa kolehiyo.
Si Ruffa amo man ang una nga graduate sang ila grupo kag padayon nga nagahatag sa iya sang inspirasyon.
Samtang, ang iya anak nga si Leon Barretto naggradwar sa amo man nga tuig, kag malipayon niya nga ginpaambit ang iya milestone sa iya iloy sa Instagram.
