Ginpahayag sang political analysts sa ciudad sang Bacolod nga posible nga liwat nga mapatuman ang martial law sa Pilipinas.
Sa interview sang Bombo Radyo Bacolod kay Atty. Jomax Ortiz, posible gid nga liwat matabo ang Martial Law bangud ang presidente ang ginhatagan sang otoridad sang constitution sang Pilipinas nga makadeklarar sini.
Suno kay Ortiz, santo sa 1987 Philippine Constitution ang presidente ang makadeklarar sang martial law sa idalom sang mga sirkumstansya kaangay sang invasion ukon rebellion kun nabutang sa risgo ang public safety kag ini ang ipatuman sa indi magsobra 60 ka adlaw.
Ginalantaw ni Ortiz nga may posibilidad sang People Power sa ginadihon nga assembly sa Enero 13 kun ini ang updan sang Armed Forces of the Philippines (AFP) kag iban pa nga indi komporme sa administrasyon ni President Ferdinand “Bongbong” Marcos Jr.
Ilabi na kun ang masa ang magasinggit na sa presidente nga untaton na ang paglagas kay Vice President Sara Duterte, bangud ang paglagas diri ang nagatuga sang suppression kag harrassment sa mga pumuluyo nga Filipino.
Gani suno kay Ortiz, ang January 13 assembly ang dapat bantayan bangud indi dapat pagpakanubuon ukon i-under estimate bangud bisan ginatawag nga damage goods ang mga Duterte, apang ang pwersa sang masa ang indi mapaktan.
