Sigurado na ang pagpauli ni Mary Jane Veloso sa Pilipinas nagikan sa Indonesia, ang Pinay nga ginhatulan sang kamatayon bangud sa kaso nga drug trafficking.
Suno sa Department of Justice (DOJ), luyag nila nga mapapauli si Veloso sa pungsod “as soon as possible.”
Suno kay DOJ spokesperson Mico Clavano, ini ang matabo matapos pormal nga nagpasugot ang Indonesia nga sayluhon sa kustodiya sang Pilipinas si Veloso.
Suno sa opisyal, nagperma ang Minister for Human Rights Corrections and Immigration kag DOJ sang Pilipinas sa practical agreements para sa official transfer ni Mary Jane Veloso pabalik sa Pilipinas.
Dugang pa sini, luyag nila nga opisyal nga i-anunsyar nga magapauli na sa Pilipinas si Mary Jane Veloso.
Si Veloso ang napriso sa Indonesia sa sulod sang 14 ka tuig matapos nga siya ang ginpamatbatan sang kaso nga drug trafficking sang 2010.
