Nagalaom ang konsehal sa ciudad sang Bacolod nga lapawan sang International Solid Waste Integrated Management Specialists, Inc. (ISWIM) ang performance sang IPM Construction and Development Corporation apisar nga parehas lamang ang balor sang bid contract.
Sa interview sang Bombo Radyo Bacolod kay Councilor Thadeus “Thaddy” Sayson, chairman sa Committe on Appropriations and Finance, ayo sini sa ISWIM nga maghatag sang maayo nga performance, samtang pasalig man sini ang suporta sang Bacolod City Government.
Pahayag sang konsehal nga kinahanglan gid sang Bacolod City ang compactor trucks bangod kun dump truck lamang, may tion nga naga-awas ang basura.
Nahibaluan nga sa 50 ka garbage trucks sang ISWIM, mayorya diri ang compactor trucks.
Ginapakamaayo man ni Sayson nga brandnew ang mga garbage trucks sang ISWIM gani indi pa mangin problema ang dugay-dugay nga repairs.
Madumduman nga isa sa nangin problema sang IPM amo ang dyutay nga garbage trucks bangod madamo sa ila nga salakyan ang guba.
Nagalaom ini nga sa bag-ong tuig kag bag-o nga garbage collector kag hauler, maga-umpisa naman ang mas maayo nga serbisyo kag solid waste management, partikular na sa collection.
