Ginpakigbahin sang Provincial Administrator sang Negros Occidental nga nagdangat na sa A-4 Category ang pagtublok sang COVID-19 vaccine, apang sa karun mas madamo ang luyag nga magpabakuna gamit ang AstraZeneca vaccine.
Suno kay Atty. Rayfrando Diaz, gintapos nila anay ang pagbakuna sa mga Senior Citizen kag may Comorbidities sa ginpatigayon nga Barangay Kapitolyo Vaccination Program kun sa diin nakabakuna sila sang 221 sang Huwebes kag 44 sang Biyernes.
Nagadangat naman sa 200 ang target sang probinsya sa mga empleyado sa kapitolyo kada adlaw.
Samtang sa nagapadayun nga vaccination program sa probinsya, nagdangat na sa 98 porsyento ang utilization rate sang napangbakuna nga Sinovac vaccine samtang yara naman sa 47 tubtob 47 porsyento ang sa AstraZeneca vaccine nga alokasyon gikan sa National Government.
Ang mga nasambit nga bakuna naman amo ang ginapanagtag sa mga local government units (LGUs) kasubong man sa Barangay Kapitolyo Vaccination Program.
Ginpakigbahin ni Diaz nga madamo sang nagapanawag sa iya nga luyag nga magpabakuna gikan sa kapitolyo nga gilayon naman nila nga ginaschedule.
Samtang ang mga nagabulig sa National Government kaangay sang Commission on Elections (COMELEC), Philippine Army kag mga volunteer ang nagpabakuna naman sang Lunes kag kahapon.
Kalabanan naman sa luyag mag pabakuna suno kay Diaz ang masluyag nga AstraZeneca vaccine ang gamiton.
Ini bangod sa mga feedbacks gikan sa mga nakapabakuna na nga mas makabatyag sang side effects ukon reaksyon ang lawas kaangay sang paghilanat kun ang nasambit nga brand ang ibakuna.
Ini ang ginapatihan nga nagapamatuod naman nga mas dako ang efficacy rate sang AstraZeneca vaccine kag mas makahatag sang proteksyon sa lawas.
Samtang ang side effect naman nga mabatyagan sa pagpatublok sang Sinovac vaccine ang yara lang sa pagkatuyo gani ginalantaw nga mas gamay ang efficacy rate sini ukon makahatag sang mas nubo nga proteksyon.
Bangod sini, mas dako sa karun ang request kag offer sa probinsya nahanungod sa AstraZeneca vaccine.
Pasalig naman ni Diaz nga ang side effects ang masarangan sang lawas kag wala pa sang may naospital matapos nga mabakunahan.
