Lauman ang mas madamo nga mga events sa Maskara Festival subong nga tuig matapos nga ginpagwa na ang schedule of events para diri.
Sa interview sang Bombo Radyo Bacolod kay Councilor Jason Villarosa, chairperson sang Committee on Tourism sa Sangguniang Panlungsod, sang tinalikdan nga adlaw, gin-unveil na ang schedule of events sa Masskara Festival 2024.
Suno kay Villarosa, mas madamo ang events subong nga tuig para sa nasambit nga kapiyestahan agud nga maenjoy sang mga local kag pangayaw kasubong man sang mga foreign visitors.
Suno diri, nagapadayon sa karun ang proseso sang screening para sa mga magapasakop sa street dance and arena competition sang Masskara Festival 2024 nga highlight sa kapiyestahan.
Suno sa konsehal ang isa sa mga requirements sa mga magapasakop sa street dance and arena competition amo ang liquidated kag wala sang pending liquidation sa ciudad bangud ang city government ang magahatag man sang assistance sa barangay nga magapasakop.
Ginalantaw nga ang premyo sa magadaog sa street dance and arena competition ang indi magnubo sa P1 Million kag ginalauman nga magdako pa ang premyo para sa team nga magachampion.
Samtang nakadepende na sa Barangay ang pag-invest sa ila team agud nga masiguro ang kadalag-an kag may yara man ang mga ini sang local stakeholders nga nagasuporta sa ila.
