Gin-athag ni Bacolod City Mayor Greg Gasataya nga libre ang pag-access kag ang pagresponde sang emergency personnel sa mga tawag sa emergency hotline 911.
Sa interview kay Gasataya, ginpasiguro sini nga gilayon nga marespondehan ang tawag sa 911 bangud ini ang nangin intension sang ciudad sang tinalikdan nga tuig nga nagdihon sang localized mergency hotline 911.
Suno kay Gasataya, pila sa mga nakita nga pagpanghangkat sa pagtawag sa 911 amo ang language barrier bangud kun wala sang localized emergency hotline ang tawag ang naga-route pa Cebu ukon Manila kag nagakadugayan ang responders.
Suno sa alcalde ang ciudad ang nag-train sang mga personnel halin sa nagkalain-lain nga departamento agud nga mangin first responders.
Padayon man ang ila nga pagpakig-angot sa mga volunteer group sa ciudad bangud ang pagresponde sa insidente ang dapat wala na sang barriers.
Nagbutang man ang alcalde sang personnel nga incharge sa paghimos sang stretcher sa tion nga ma-admit na ang gindala nga pasyente sa ospital bangud sang tinalikdan ginabilin lamang sang mga ambulansya ang stretcher sa ospital.
Natalana nga patigayunon ang official launching matapos ang inspection sang DILG National sang tinalikdan nga semana.
