13 ka mga buluthuan ang nagkansela sang klase sa Brgy Sto. Ninio, Tanjay City, Negros Oriental kasunod sa nagluntad nga engkwentro sa tunga sang 11th Infantry Battalion sang Philippine Army kag gina-alegar miyembro sang New People’s Army.
Sa interview sang Bombo Radyo kay Punong Barangay Dexter Ilao, 22 ka pamilya ukon 109 ka mga indibidwal ang gin-evacuate sa area kun diin nagluntad ang engkwentro kag sila ang temporaryo nga nagatinir sa tatlo ka evacuation centers samtang padayon pa ang clearing sang militar sa lugar.
Suno diri, ginhatagan sang food packs ang mga evacuees kag mga relief goods halin sa Barangay hall kag kay Mayor Jose Orlino sa pagbisita sini sa evacuation center.
Pahayag ni Ilao, kahapon sang aga nakita sini sa social media nga may engkwentro nga nagluntad ginabanta alas- 5:30 sang kaagahon apang wala ini una nagpati bangod indi man bation sa ila ang pagbaylohanay sang lupok apang nakabaton ini sang kumpirmasyon pasado alas- 6:00 na sang aga.
Suno kay Ilao, nag-abot ang mga evacuees alas- 5:00 na sang hapon sa Barangay hall.
Mahibaloan nga apat ka Barangay sa ciudad ang apektado nga ginalakipan sang brgy. Sto. Niño, brgy. Pal-ew, brgy. Bahian, kag brgy. Sta. Cruz Nuevo.
Ang barangay Sto. Nino amo ang pinakadako nga brgy sa ciudad amo nga madamo sang evacuees kag masobra 10 ka buluthuan ang wala sang klase.
