15 ka mga banwa kag 144 ka mga barangay sa Western Visayas ang naapektuhan sang pag-ulan tuga sang Low Pressure Area kag Intertropical Convergence Zone (ITCZ) kahapon.
Sa interview sang Bombo Radyo kay Ma. Aletha Nogra, officer-in-charge sang Office of the Civil Defense Region 6, 10,580 ka pamilya kag 44,052 ka mga indibidwal ang naapektuhan sang pagbubo sang ulan kahapon kun sa diin 2,896 ka pamilya kag 11,022 ka mga indibidwal ang yara sa evacuation center.
Samtang, 2,181 ka pamilya kag 9,592 ka mga indibidwal naman ang nagtinir sa ila mga himata.
Suno kay Nogra, sa Negros Occidental, may isa ka barangay sa San Carlos City nga naapektuhan, 14 ka pamilya kag 52 ka mga indibidwal kun sa diin apat ka pamilya kag 28 ka mga persona ang nagtinir sa evacuation center.
Sa Capiz, 43 ka mga barangay, 3,995 ka pamilya kag 18,599 ka mga indibidwal ang naapektuhan sang pag-ulan kag pagbaha.
127 ka pamilya kag 383 ka mga indibidwal ang yara sa evacuation center samtang 252 ka pamilya naman ang mas ginpili nga magtinir sa ila mga himata.
100 ka barangay, 6,615 ka pamilya kag 25,401 ang naapektuhan sa Iloilo Province kun sa diin 2,765 ka pamilya kag 10,611 ka mga indibidwal ang yara sa evacuation center.
1,999 ka pamilya kag masobra 7mil ka mga persona naman ang nagtinir sa ila tagsa-tagsa ka mga himata.
May narekord man nga mga national roads nga indi malabayan Region 6 samtang may nareport nga soil erosion sa Dumarao, Capiz kag landslide sa Iloilo.
Suno kay Nogra, ang Emergency Operation Center, nga yara sa karun sa idalum sang blue alert status, ang nagacoordinate sa mga local government units kun may yara sang mga evacuees.
Suno sa iya, ginatun-an pa ang tiyempo kag mga flooded areas ilabi na sa may river system kun nagapadayon ang pagsaka sang tubig kag pag-ulan.
Nagapadayon man ang ila koordinasyon sa Department of Public Works and Highways kag mga local government units.
Nagpanugyan ini sa mga pumuluyo nga padayon nga bantayan ang dalagan sang panahon bangud magluwas sa Low Pressure Area, may embedded Localized Thunderstorms pa nga makatrigger sa paglain sang tiyempo.
