Masobra 100 ka mga police trainees ang nagdonar sang dugo sa Dugong Bombo 2019 sa City Mall Mandalagan sang Sabado.
Sa interview sang Bombo Radyo Bacolod kay John Christopher Jimeno, representative sang PSPRC Class 2019-02 Class Itinakda nga nagatinir sa Murcia, ginpahayag sini nga 118 tanan ka mga police trainees ang nagpresentar nga magbulig sang mahibaluan nila nga may yara sang Dugong Bombo.
Si Jimeno ang isa ka registered nurse sa Department of Health (DOH) sadto gani ika-walo niya na ini nga pagdonar sang dugo.
Suno sa iya, motibasyon niya ang iya nga amay nga isa ka retired police kag gusto niya nga sundon ang mga nahimo sini gani nagdesisyon siya nga magsulod sa PNP.// Ginpahayag niya man nga sa propesyon nga iya subong nga ginpili, pinakauna gid nga bagay ang volunteerism.
Suno sa police trainee, nagtulog siya sang timprano kag ginkondisyon niya gid ang iya nga lawas antes magdonar bangud gusto niya nga mangin successful blood donor.
Samtang, kaupod ang 15 ka mga personnel sini, nagpakigbahin man sa Dugong Bombo 2019 ang commander sang 1st Negros Occidental Provincial Mobile Force Company nga naka-base sa ciudad sang Sagay.
Timprano pa nga nagpadulong sa City Mall Mandalagan si Police Lt. Col. Arnel Solis upod ang mga tinawo sini agud magdonar sang dugo.
Suno diri, madugay na siya nga wala naka-donate sang dugo gani nalipay gid siya sa ginhatag nga kahigayunan sang Bombo Radyo agud makabulig siya sa mga nagakinahanglan.
Wala man ini nagduha-duha nga magresponder sang imbitasyon sang estasyon bangud suno kay Solis, naagyan niya man sang una nga magpangayo sang dugo sa Philippine Red Cross.
Nagapang-agda gid ini sa iban nga mag-donate sang dugo sa masunod nga bloodletting activity sang Bombo Radyo kag Star FM.
