BACOLOD CITY-Masobra P11.6 million nga balor sang ginapatihan iligal nga druga ang nakuha sa maglive-in partner sa ginpatigayon nga joint buybust operation sang Regional Drug Enforcement Unit (RDEU) kag sang City Drugs Enforcement Unit (CDEU) sa Green Plains Subdivision, Barangay Singcang Airport, Bacolod City sini nga hapon.
Ginkilala ang subject person kay Joy Diamante, 18-anyos kag ginakabig bilang high value individual.
Nadakpan man ang live-in partner ni Diamante nga si Rafael Cantuar, 23-anyos, lunsay mga residente sang Purok Langis, Barangay Banago, ciudad sang Bacolod.
Suno kay Lt. Thursly Castillo, team leader sang RDEU, 210 tanan ka mga sachet ang ila nakuha sa possession kag kontrol sang duha nga ginabanta nagabug-at sang isa ka kilo kag napulo ka gramos nga may balor nga P11,605,000.
Suno kay Castillo, madugay na nila nga ginamonitor si alyas Joy.
Dugang pa sang team leader nga ginapangita pa nila ang lima ka mga persona nga kaupdanan sang subject person.
Samtang, nagapasalamat naman si Punong Barangay Rosinie Distrito nga gilayon nga nadakpan ang mga suspetsado.
Suno diri, mas maayo nga nadakpan sang mas timprano ang maglive-in partner antes pa man sila nakapanghalit sa mga pumuluyo.
Suno kay Distrito, tatlo ka adlaw pa lamang nga nagatinir sa ginarentahan nga kwarto ang duha kag ginapahayag nga taga-Barangay Banago ang mga ini.
Nagapangabay naman ang punong barangay sa mga tag-iya sang mga boarding house ukon nagapa-renta sang balay nga indi basta-basta magpasulod sang boarders kag ipahibalo gid anay sa barangay.
