BACOLOD CITY — Patigayunon na subong nga aga ang mass oath-taking sang linibo ka mga Negrense nga magasulod sa PDP-Laban nga amo ang partido ni Presidente Rodrigo Duterte.
Simultaneous ukon dungan nga patigayunon sa ciudad sang Victorias kag diri sa ciudad sang Bacolod ang pagsumpa sang bag-o nga mga miyembro sang partido.
Siyam ka libo ang ginalauman nga magapanumpa sa Victorias City Coliseum samtang malapit tatlo ka libo naman sa oath-taking ceremony nga patigayunon sa University of Negros Occidental – Recoletos ukon UNO-R.
Mismo si House Speaker Pantaleon Alvarez nga amo man ang secretary-general sang PDP-Laban national chapter kag ang Bacoleño nga si BIR Deputy Commissioner for Legal Group Atty. Jesus Clint Aranas ang magapanguna sa oath-taking sa ciudad sang Victorias antes sila magbisita sa UNO-R.
Una na nga gin-athag ni PDP Laban Negros Island secretary-general Yves Akol nga wala sang pilitay ang pagsulod sa partido kag ang mayor nga katuyuan sini amo nga mas mapalapnag ang ideya tuhoy sa federalismo nga ginaduso ni Presidente Duterte.
