Masobra sa 130 ka mga pamilya sa Brgy 39, ciudad sang Bacolod ang maapektohan sa pagpahalin sang Negros Occidental Provincial Capitol sa duta nga ginapanag-iyahan sini.
Ginserbehan sang Final Demand to Vacate ang mga residente sang Brgy 39 agud pahalinon sa area.
Mahibaluan nga ang duta ang gindonar sang pamilya Lizares sa Negros Occidental High School (NOHS) sadtong 1954 agud tamnan sang mga pananom.
Apang wala ini natigayon nga naggamit bilang agricultural land.
May yara man sang government offices nga nahamtang sa area apang ini ginhatag sang pamilya Lizares sa probinsya samtang ang nabilin naman nga area ang gin-istaran sang informal settlers.
Sa interview sang Bombo Radyo kay Brgy. Kagawad Alfredo Gallego, luyag lamang nila nga maatubang si Governor Eugenio Jose ‘Bong’ Lacson agud maklarohan kun ano ang matabo sa ila.
Suno diri, mas maayo kun tani nga hatagan na lang sila sang lugar nga pwede masaylohan sang sa hatagan sila sang financial assistance nga indi man makaigo sa pagpatindog sang bag-o nga balay kag liwat nila nga pag-umpisa sa pagpangabuhi.
