Masobra 1,300 ka mga baboy ang napagwa sang probinsya sa sulod sang napulo ka adlaw.
Sa interview sang Bombo Radyo kay Dr. Placida Lemana, head sang Provincial Veterinary Office, humalin sang nagsugod ang pagban sang Cebu sa pagpasulod sang pork kag pork products nagikan sa probinsya, ang mga hog raisers ang nagpangita na lamang sang idea kun diin makaagi kag diin dal-on ang ila baboy.
Suno sa iya, humalin Marso 7 tubtob Marso 16, nagdangat sa 1,025 ka mga baboy ang napadala sa Luzon samtang 342 naman sa Western Visayas.
Sa kabug-usan 1,367 ka mga baboy ang napaagwa sa probinsya sa sulod lamang sang napulo ka adlaw.
Sang tinalikdan nga tuig, naga-average sa 5,000 tubtob 6,000 kada bulan ang ginapagwa sang probinsya nga baboy samtang sang Enero tubtob Pebrero sini nga tuig, yara ang average sa 3,500 tubtob 4,500.
Bangud nga may nagpositive man sa African Swine Fever sa Carcar City, Cebu, ginban man ang pagpasulod sang mga pork kag pork products nagikan sa probinsya.
Suno kay Lemana, tuman ka hugot ang protocol kag seguridad sa mga ports sa probinsya kag mismo si Governor Bong Lacson ang nagpadugang sang tawo agud magbantay.
Nagapasalamat ini bangud hilway sa gihapon ang Negros Occidental sa ASF gani sarang ang probinsya nga makaship out sang baboy maskin diin.
Suno diri, kapin 493,000 nga baboy ang ginaproteksyunan sa probinsya gani nagahingyo ini sa mga pumuluyo nga mag-ugyon sa mga tikang sang local government units para sa kaayuhan sang kadam-an.
