Nakapauli na sa ila tagsa ka pamalay ang masobra 1,400 nga mga Internally Displaced Persons (IDPs) sa pag-alburuto sang Bulkan Kanlaon gikan sa banwa sang La Castellana.
Sa interview sang Bombo Radyo Bacolod kay La Castellana Municipal Disaster Risk Reduction and Management Office Head John de Asis, nag-umpisa ang ila decamping alas-9:00 kahapon sang aga, kun sa diin antes ang pagbyahe, may ginpatigayon man nga debriefing kag disaster preparedness orientation.
Samtang ginpabalunan man ang mga ini sang hygiene kits kag emergency balde, nga may unod nga mga food packs.
Ginpaseguro naman nila nga preparado ang mga nakapauli kag permi nga nakapreparar sang mga kinahanglan dal-on inkaso nga liwat maglupok ang bulkan.
Ang mga ginpapauli amo ang mga evacuees nga gikan sa 4km to 6km extended danger zone sang Bulkan Kanlaon gikan sa Barangay Mansalanao, Cabagnaan, Masulog kag Biak-na-Bato.
Ini matapos nga mapanaog na sa Alert Level 2 ang status sang Bulkan.
Samtang ang mga nagapuyo sa sulod sang 4km permanent danger zone ang indi naman mahimo makabalik.
Nagpabilin man sa mga evacuation sites sa tagsa ka Barangay ang pila ka vulnerable sectors kaangay sang senior citizens, persons with disability kag mga may balatian.
Ang mga wala na ginagamit nga mga tents ang ila naman nga ginpanghimos kag ginbutang sa gintalana nga warehouse.
Apang sa pihak sang pagpauli sang mga pumuluyo, nagsugata sa mga ini ang guba nga mga panimalay.
Nangin masako man ang mga ini gilayon sa pagpanglimpyo kag repairs, kag sa karun wala paman sang may nabatun nga complaints ang La Castellana MDRRMO.
