Nagdangat sa 1,771 ka mga registrants ang natalana nga kakason sang Commission on Elections Bacolod sa voters list.
Sa interview sang Bombo Radyo kay Bacolod City Election Officer Atty. Kathrina Caña, natapos na sang Lunes ang ila nga Election Registration Board (ERB) hearing kag gintalakay ang pagkakas sang mga double registrants, nagsaylo na sang registration kag ang mga nagtaliwan na.
Ang mga double registrants nga ginkakas ang nagdangat sa 504.
Suno kay Caña, nagasige na ang ila nga trabaho sa ginahimo nga preparasyon sa natalana nga October 2023 Barangay kag SK Elections.
Ang filing sang COC ang natalana sa Agosto 28 tubtob Setyembre 2, 2023.
334,441 naman ka mga voters ang narehistro sa syudad sang Bacolod.
Kabahin man sang preparasyon sang COMELEC ang pagbriefing sang mga manunudlo nga qualified agud nga magserbe sa natalana nga Barangay kag SK Election sa bulan sang Oktubre subong nga tuig.
Suno kay Caña, wala naman sang iban nga ginarequire ang COMELEC sa mga kandidato sa Barangay kag SK elections magluwas nalang sang filing sang Certificate of Candidacy kag pagtuman sang requirements bilang isa ka kandidado.
