Masobra 170,000 ka agrarian reform beneficiaries sa bilog nga Western Visayas ang makabenepisyo sa New Agrarian Reform Emancipation Act ukon Republic Act 11953 nga naga-condone ukon nagadula sang tanan nila nga loans nga nagabalor sang masobra P57 billion.
Suno kay Atty. Sheila Enciso, acting regional director sang DAR Region 6, wala na sang bayaran sa principal loan, arrears ukon interests kag surcharges ang nahatagan sang duta halin sang nagsugod ang Comprehensive Agrarian Reform Program tubtub nangin layi ang Agrarian Emancipation Act kahapon.
Nahibaluan nga nagabayad ang benepisyaryo sa private-owned nga agricultural lot bangud ginbayaran ini sang gobyerno sa LandBank.
Indi naman palareho ang ginabayaran sang ARB bangud nakadepende ini sa nakatanom, samtang pinakamanubo ang idle land ukon wala sang tanom.
Bangud wala na sila sang bayaran nga loan suno kay Enciso, dako na ini nga natipid sang ARB kag magamit nalang sa iban nga galastuhan kaangay sang abono kag pagpaeskwela sang ila kabataan.
Ini naman ang una nga kahigayunan nga naghatag ang gobyerno sang condonation sang loan humalin sang ginpatuman ang CARP sa idalom sang administrasyon ni anay President Ferdinand E. Marcos.
Nagpahanumdom naman si Enciso sa mga ARBs nga indi pwede mabaligya ang duta nga ila nabaton paagi sa CARP.
