Masobra 20 ka colorum nga tricycle ang gin-impound sang Bacolod Traffic Authority Office kaina sang aga sa Bangga Cory, Barangay Taculing, Bacolod City.
Una diri, ginhingalitan sang mga driver sang colorum nga tricycle nga magbyahe bangud nag-untat byahe ang tatlo ka transport group nga ginalakipan sang Bacolod Alliance for Commuters Operators and Drivers (BACOD), United Negros Drivers and Operators Center (UNDOC) kag Negros-Bacolod Transport Coalition (NBTC).
Alas-6:30 tubtob alas-7:00 kaina sang aga nagdamo ang mga pasahero ilabi na mga estudyante kag mga empleyado sa Bangga Cory gani nagginutok ang mga pasahero sa modernized jeepney.
Sa interview sang Bombo Radyo kay Alona, isa sa mga pasahero nga naghulat sa Banga Cory, na-late na ini sa meeting sa eskwelahan sang iya bata bangod nga madamo sang pasahero nga nagahulat sa modernized jeepney.
Samtang, wala naman naghatag sang libre sakay ang siyudad sa paglaum sini nga wala sang dako nga epekto ang untat byahe sang mga traditional jeepney.
