Masobra 21,000 ka mga kapulisan ang iga-deploy sang Philippine National Police (PNP) bilang seguridad para sa ikalima nga State of the Nation Address (SONA) ni President Ferdinand Marcos Jr. sa Batasang Pambansa sa Quezon City subong nga adlaw, Hulyo 27.
Suno kay PNP Chief Police General Jose Melencio Nartatez Jr., nakumpleto na nila ang security protocol kag ginapatigayon na lamang ang phased deployment sang mga pulis sa mga lugar nga nagakinahanglan sang mas hugot nga pagbantay.
Ginmanduan man ang mnga kapulisan nga ipabilin ang maximum tolerance.
Hingyo man sini sa mga grupo nga magapatigayon sang protesta nga magpakig-angot sa mga otoridad kag sundon ang mga patakaran agud mapabilin ang kalinong.
Nakafull-alert status naman ang PNP sa Metro Manila.
Magapatuman man sang hugot nga gun control measures bwas.
Samtang, ipatuman man ang no-fly zone kag no-drone zone sa pila ka mga lugar, partikular na sa palibot sang Batasang Pambansa kun sa diin ipatigayunon ang speech sang presidente.
Tatlo ka grupo ang gintugutan sang Quezon City government nga magpatigayon sang mga rally sa Commonwealth Avenue: ang Bagong Alyansang Makabayan, Sanlakas, kag Better Brighter.
Ginmando man sang PNP chief sa tanan nga kapulisan nga maggamit sang body-worn cameras kag iban pa nga recording equipment agud masiguro ang transparency sa ila mga operasyon.
