Nagalaom ang masobra 30 ka mga Negrense nga na-stranded kag nadulaan sang trabaho sa Boracay bangud sa coronavirus disease 2019 nga makapauli diri sa probinsya.
Sa interview sang Bombo Radyo Bacolod sa isa sa mga stranded Negrense sa Boracay nga si Melissa Joy Balagosa kag residente sang Barangay Mandalagan, Bacolod City, ginpahayag sini nga nagalaom sila nga mabuligan sang probinsya nga makapauli bangud tuman na ka budlay sang ila sitwasyon didto karon ilabi pa nga wala sila sang mga trabaho.
Suno diri, anom sa masobra 30 ka mga stranded Negrense ang taga-ciudad sang Bacolod.
Halos tanan sa ila ang naga-obra sa mga hotel kag wala karon sang mga trabaho kasunod sang pagsirado sang mga establisyemento.
Kalabanan sa ila ang nagatinir sa mga boarding house.
Suno sa iya, kabudlay sang ila karon sitwasyon didto bangud wala na sila sang kwarta kag tuman pa ka mahal sang cost of living sa Boracay.
Ginkumpirmar man ni Balagosa nga nakapakig-angot naman siya kay Councilor Cindy Rojas.
Nagalaom ini nga mabuligan sila sang probinsya kag sang city government nga makapauli na.
SAMTANG, yara na sa Medalla Integrated School ang first batch sang mga returning residents sang Bacolod nga nastranded bangud sa ginpatuman nga enhanced community quarantine agud nga matapna ang paglapta sang coronavirus disease 2019 (COVID-19) para sa 14 days mandatory quarantine.
Sa interview sang Bombo Radyo Bacolod kay Councilor Cindy Rojas, ginhandaan sang syudad ang pag-abot sang mga ini.
Madumduman nga ginpatinluan sang siyudad ang nasambit nga eskwelahan.
Ginpatakdan sang screen ang bintana kalakip na ang pwertahan agud indi masudlan sang lamok, may yara sang tagsa ka hygiene kit kag ginbutangan naman sang divider bangud duha ang maoccupy sa isa ka kuarto.
Ginbutangan man sang electric fan agud mangin well ventilated ang tiniran sang mga estudyante.
Ang mga estudyante ang nagikan sa Iloilo bangud estudyante ang mga ini sa University of the Philippines Visayas.
Antes pa man ang mga ini nakapauli gin-issuehan na ang mga ini sang certificate of acceptance sang syudad santo man sa protocol sang Inter-Agency Task Force (IATF).
Sa pinakaulihi nga report sang DOH Region 6, nagdangat na sa 80 ang kumpirmado nga COVID cases sa Western Visayas matapos marekord ang walo ka bag-o nga mga kaso.
Naglab-ot naman sa 31 ang nakarecover kag napulo ang patay.
