Masobra sa 300 ka mga indibidwal sa banwa sang La Castellana, Negros Occidental gin-evacuate bangod sa pagbaha nga nagluntad sa tatlo ka Brgy sa banwa kagab-i.
Sa interview sang Bombo Radyo Bacolod kay La Castellana Mayor Añejo Nicor, tatlo ka Brgy ang nag-eksperyensya sang pagbaha nga ginalakipan sang Brgy Sag-ang, Robles kag Biak na Bato.
Tuman nga naapektohan sang pagbaha amo ang Brgy Biak na Bato, ilabi na ang mga panimalay nga nahamtang malapit sa Tamburong creek.
Suno diri, nagdugang na gid ang ila problema indi lamang sa pagtransport sang mga volcanic materials halim sa creek apang madamo na sa mga pumuluyo ang tuman nga naapektohan bangod indi na ka ilig sa sapa ang tubig tuga sa pagsupon sang mga volcanic materials.
Sa bahin sang Brgy Biak na Bato may yara sang 62 ka pamilya ukon 117 ka indibidwal nga gin-evacuate; sa Brgy Robles may 20 ka pamilya kag 70 ka indibidwal nga gin-evacuate; kag sa Brgy Sag-ang naman may yara sang 20 ka pamilya kag 85 ka indibiwal nga gin-evacuate.
May yara man sang mga nareport nga damaged nga balay apang ini iverify pa agud mahatagan sang bulig.
