Masobra 300 ka mga classrooms sa ciudad sang Bacolod ang naguba bangod sa bagyo Tino.
Sa interview kay RJ Paglumotan, Deputy Spokesperson sang Department of Education (DepEd) Division of Bacolod, sa 38 ka buluthuan nga apektado sa ciudad, 349 diri ang major damaged kag minor damaged nga mga classrooms.
Suno diri, nagapanguna sa may pinakamadamo nga nagub-an nga classroom amo ang Bacolod City National High School, Antonio L. Jayme Elementary School kag Emiliano Lizares National High School.
Ang major damaged classrooms natumbahan sang mga puno kag nagub-an sang bintana samtang ang minor damaged naman ang may gamay nga guba sa pader kag atop.
Iban sa mga buluthuan nagsuspendi sang face to face class kag nagshift sa Alternative Delivery Mode.
Pahayag ni Paglumotan, iban naggamit sang emergency fund sang DepEd sa pagpakay-o sang classrooms samtang ang iban naggamit naman sang pondo halin sa ila local school funds.
