Masobra 320 ka mga pamilya sa Northern Negros Occidental ang nag-evacuate matapos magsaka ang lebel sang tubig bangud sa pag-ulan dala sang Bagyo Auring.
Nahibaluan nga ginpaidalom sa Signal No. 1 ang Northern Negros bangud sa bagyo.
Kalakip sa mga nag-evacuate amo ang mga residente sang Sagay City, Victorias City kag San Carlos City.
Sa interview sang Bombo Radyo Bacolod kay Rodolfo Retirado, pinuno sang Victorias City Disaster Risk Reduction and Management Office, ginpahayag sini nga pito ka mga pamilya ukon 21 individuals ang nag-evacuate sa ila nga ciudad matapos nga nagsaka ang lebel sang tubig sa Malihao river.
Suno kay Retirado, naglab-ot sa 11 feet ang kataason sang tubig sa suba.
Samtang, kabug-usan naman nga 183 families ukon 639 individuals ang nag-evacuate sa Sagay City bangud sa pagsaka sang lebel sang tubig sa Himogaan river.
Suno kay Jorge Encabo, Sagay CDRRMO staff, 163 families ukon 583 individuals ang nag-evacuate sa Himogaan Baybay; isa ka pamilya ukon anom ka mga indibidwal naman ang nag-evacuate sa Barangay Old Sagay kag 19 families ukon 50 individuals ang nag-evacuate sa Barangay Taba-ao.
May pila naman ka mga taytay ukon overflow ang indi sa gihapon karon passable.
133 ka mga pamilya naman ang nag-evacuate sa ciudad sang San Carlos.
Suno kay Mayor Rene Gustilo, 34 ka mga pamilya ukon 83 ka mga indibidwal ang nag-evacuate sa Barangay 1; 60 families ukon 211 indibidwal ang nag-evacuate sa Barangay 5; kag 39 ka pamilya ukon 109 ka mga indibidwal naman ang nag-evacuate sa Barangay Rizal.
Suno sa alkalde, 24/7 man nga nakabantay ang ila nga command center.
Sa karon, padayon nga nakamonitor kag nakatutok sa Bagyo Auring ang mga otoridad sa Negros Occidental.
