Masobra 340 mil ka mga indibidwal kag masobra 6,600 ka mga establisyemento sa Bacolod City ang nakaparehistro sa Bacolod City COVID-19 Contact Tracing (BaCTrac) system kadungan sa pagtakop sang registration sini kahapon, Nobyembre 12.
Sa interview sang Bombo Radyo Bacolod kay Councilor Renecito Novero, ginpahayag sini nga kabug-usan nga 340,358 ang nakaparehistro nga mga pumuluyo samtang 6,611 ang registered establishments sa ciudad.
Suno kay Novero masobra 50 porsyento lamang sang kabilugan nga pumuluyo samtang 30 tubtob 35 porsyento naman ka mga establisyemento sa Bacolod ang nakaparehistro.
Nahibaluan nga nagadangat sa masobra 600 mil ang residente sa ciudad samtang kapin 20 mil naman ang mga business establishments.
Suno sa konsehal mas maayo gid kun may yara sang BacTrac agud mas mangin mahapos kag madali ang contact tracing.
Nahibaluan nga kun wala nakaparehistro ang business establishment sa BacTrac system, dapat may yara sila sang manual logbook.
Pananglitan nga wala pa gid sang manual logbook, may penalidad ang tagdumalahan sang establisyemento nga P1,000 para sa 1st offense, P2,500 sa 2nd offense kag P5,000 kag pagkapriso nga indi maglapaw sa anom ka bulan para sa 3rd kag last offense.
Sa karon suno kay Novero, iga-monitor pa sang Emergency Operation Center kun may yara sang problema ukon kakulangan sa BacTrac kag iga-rekomendar nila ini dayon sa Sangguniang Panlungsod agud ma-amyendahan ang city ordinance angot sa pagpatuman sang BacTrac system sa ciudad.
