374 mil pesos nga balor sang iligal nga druga ang nakuha sa buybust operation nga ginpatigayon sa Cottage Road, Purok Matahum, Barangay Mansilingan ciudad sang Bacolod kahapon.
Dakop sanday Joebern Hermosura kag Fernando Tandoy samtang nakapalagyo naman si Arjie Villarosa nga lunsay mga high valued target.
Sa interview sang Bombo Radyo Bacolod kay Philippine Drug Enforcement Agency (PDEA) Bacolod team leader Agent Bamboo, ginpahayag sini nga indi mga bag-uhanon nga manugbaligya ang mga suspetsado bangud nakahibalo ang mga ini magkilatis kun operatiba ang nagabakal sa ila ukon indi.
Natigayon nga makuha sa ila paghinakop ang 55 gramos sang iligal nga druga, P10,500 buybust money, 100 subscribed money, isa ka cellphone kag isa ka motorsiklo.
Sa karon padayon pa nga ginapangita si Villarosa samtang priso naman sanday Hermosura kag Tandoy kag natalana nga pasakaan sang kaso sa pagbayolar sang RA 9165 ukon Comprehensive Dangerous Drugs Act of 2002.
