Masobra 400 ka mga police personnel ang gindeploy sa pagpatigayon sang Bacolod Chicken Inasal Festival.
Sa interview sang Bombo Radyo Bacolod kay Police Lt. Col. Ronnie Brillo, pinuno sang Bacolod City Mobile Force Company, ginpatigayon ang chicken inasal festival sa Upper East Megaworld, North Capitol Road, kag manokan country.
Kahapon, sa pagbukas sang festival gindeploy man ang 433 ka mga personnel para magbantay sa tatlo ka area.
Apang, subong nga adlaw, may yara sang dugang nga 139 personnel para sa pagpatigayon sang Mayor Albee Sports Festival kag bwas, ulihi nga adlaw sang chicken inasal festival, may dugang pa gid nga 95 personnel.
Sa kabug-usan masobra sa 650 tanan ka mga personnel gikan sa Bacolod City Police Office (BCPO) ang magapatigayon sang peace and order, inspection, checkpoint, kag pagrobing sa area.
Kaupod man sang kapulisan nga nakastandby inkaso nga may magluntad nga insidente, amo ang Bureau of Fire Protection (BFP), City Disaster Risk Reduction and Management Office (CDRRMO), Department of Health (DOH), Department of Social-Services & Development (DSSD) kag iban pa.
Samtang, nagpasalig naman si Bacolod City Police Office director Police Col. Noel Alino sang seguridad sang tanan sa pagtinir sa ciudad, indi lamang sa karun nga ginapatigayon nga Bacolod Chicken Inasal Festival apang sa tanan man nga tion.
Suno diri, nag-ugyon man ang panahon sa pagselebrar sang festival kag nagpasalig ini nga bisan pa wala sang dalagko nga mga event padayon ang pagtrabaho sang BCPO sa pagpabilin sang kalinong sa ciudad.
