Masobra 400 mil nga balor sang iligal nga druga ang nakuha sa joint buybust operation nga ginpatigayon sang Talisay City Police Station kag Silay City Police Station sa Purok Mapalaron, Barangay Zone 12 ciudad sang Talisay kahapon sang hapon.
Ginkilala ang suspetsado kay Raymund Horario, isa ka high-value individual kag residente sang Purok Ipil-Ipil, Barangay Mambulac, Silay City.
Sa interview sang Bombo Radyo Bacolod kay P/Major Jigger Gimeno, hepe sang Talisay City Police Station, ginpahayag sini nga madugay na nila nga ginamonitor ang suspetsado.
Dugang pa sini nga nagpakig-angot sa ila ang Silay City PNP bangud madugay naman nila nga ginapangita si Horario.
Ginapahayag nga mga duha na ka bulan sa Purok Mapalaron ang suspetsado.
Suno kay Gimeno, ginakabig bilang bodegero sang iligal nga druga ang suspetsado bangud ini lamang ang nagahatag sang shabu sa mga kliyente ni Michael Divinagracia kag indi ini mismo ang nagabaligya.
Pahayag pa sang hepe nga ginasulod sini sa habon ang iligal nga druga agud nga indi madetect.
Natigayon nga makuha sa possession kag kontrol ni Horario ang 11 tanan ka mga dalagko nga sachet sang suspected shabu lakip na ang buybust item nga nagabug-at sang 60 gramos kag nagabalor sang P408,000.
Yara na karon sa custodial facility sang Talisay City Police Station ang suspetsado kag natalana nga pasakaan sang kaso sa pagbayolar sang RA 9165 ukon Comprehensive Dangerous Drugs Act of 2002.
