Masobra 50 ka mga job order employees sang Barangay Tangub sa ciudad sang Bacolod ang nagprotesta sa sagwa sang barangay hall subong nga adlaw bangud nga wala pa sila nakabaton sang sweldo halin sang bulan sang Enero.
Nahibaluan nga wala nagpirma ang lima ka mga barangay kagawad sang resolusyon agud masweldohan ang mga job order employees bangud sa gina-alegar may yara sang mga ghost JO’s.
Una na nga nagpahayag sang tinalikdan si Kagawad Joan Sonota nga nagsugod sila himo sang budget appropriation para sa 2021 kag may ginpermahan sila nga plantilya nga nalakip ang pangalan sang mga empleyado.
Sang ila ginlantaw ang dokumento, may mga nalakip sa lista nga sang 2019 pa nagtaliwan gani sila ang natingala.
Gani sang Enero, nagrequest sila sang payroll kag warm bodies ukon makit-an gid ang mga job order employees nga nalakip sa listahan.
May nagagwa man nga indi pareho ang balor sang ginapermahan sang mga empleyado sa balor nga ila nagakabaton.
Suno naman kay Rochelle Parreño, isa sa mga job order employee, nagaayo sila sa lima ka mga kagawad nga magpirma na kuntani sa resolusyon agud marelease na ang ila sweldo.
Suno sa iya, kinahanglan gid nila ang kwarta nga ila man ginpangabudlayan ilabi na subong nga may yara sang pandemic.
Nagalaom ini nga makaatubang nila ang lima ka mga kagawad agud nga mapaathagan man sila kag maka-istoryahanay.
